బ్రిటన్: క్రికెట్ మక్కాగా పేరొందిన ప్రతిష్టాత్మక లార్డ్స్ మైదానంలో టీమిండియా ఉమెన్స్ టీమ్ నయా చరిత్ర సృష్టించింది. యస్తికా భాటియా సెంచరీతో కదం తొక్కగా.. క్రాంతి గౌడ్ 7 వికెట్లతో చెలరేగడంతో ఇంగ్లాండ్ మహిళా జట్టుతో జరిగిన ఏకైక టెస్ట్లో భారత అమ్మాయిలు 270 పరుగుల భారీ తేడాతో చారిత్రాత్మక విజయాన్ని అందుకున్నారు. 457 పరుగుల లక్ష్యంతో సెకండ్ ఇన్నింగ్స్ ప్రారంభించిన ఇంగ్లాండ్ 186 పరుగులకే ఔట్ అయ్యింది. 130/6తో నాలుగో రోజు ఆట ఆరంభించిన ఇంగ్లీష్ అమ్మాయిలు భారత బౌలర్ల ధాటికి మరో 56 పరుగులే చేసి చివరి నాలుగు వికెట్లు కోల్పోయిరు. దీంతో ఇండియా 270 పరుగుల భారీ తేడాతో విజయాన్ని నమోదు చేసి చరిత్ర సృష్టించింది.
ఈ ఏకైక టెస్ట్లో టీమిండియా అమ్మాయిలు ఫస్ట్ ఇన్నింగ్స్లో 285 పరుగులు చేసి ఆలౌట్ అయ్యారు. ఓపెనర్ స్మృతి మందనా (83), కెప్టెన్ హర్మన్ ప్రీత్ కౌర్ (58), స్టార్ ఆల్ రౌండర్ దీప్తి శర్మ (57) హాఫ్ సెంచరీలతో రాణించారు. అతిథ్య ఇంగ్లాండ్ అమ్మాయిలు ఫస్ట్ ఇన్నింగ్స్లో కేవలం 170 రన్స్ మాత్రమే చేసి ఆలౌట్ అయ్యారు. వికెట్ కీపర్ జోన్స్ (52) హాఫ్ సెంచరీతో ఆకట్టుకోగా.. నాట్ స్కీవర్ బ్రంట్ (44) రాణించింది. భారత బౌలర్లలో క్రాంతి గౌడ్ 5 వికెట్లతో ఇంగ్లాండ్ పతనాన్ని శాసించింది. దీంతో ఫస్ట్ ఇన్నింగ్స్లో ఇండియాకు 115 పరుగుల ఆధిక్యం లభించింది.
►ALSO READ | 18 ఏళ్ల బంధానికి బ్రేక్: CSK హెడ్ కోచ్ పదవికి స్టీఫెన్ ఫ్లెమింగ్ గుడ్ బై
సెకండ్ ఇన్నింగ్స్లో ఇండియా అమ్మాయిలు దుమ్మురేపారు. వికెట్ కీపర్ యస్తికా భాటియా (113) చారిత్రాత్మక సెంచరీతో కదం తొక్కగా.. స్మృతి మందనా (70), రిచా ఘోష్ (50) అర్థ సెంచరీలతో ఆకట్టుకున్నారు. ఈ క్రమంలో 341 పరుగుల వద్ద టీమిండియా ఇన్నింగ్స్ డిక్లేర్ చేసింది. దీంతో ఫస్ట్ ఇన్నింగ్స్ ఆధిక్యం కలుపుకుని ఇంగ్లాండ్ 457 పరుగుల లక్ష్యంతో సెకండ్ ఇన్నింగ్స్ ఆరంభించింది. రెండో ఇన్నింగ్స్లోనూ ఇంగ్లాండ్ అమ్మాయిలు సత్తా చాటలేకపోయారు. భారత బౌలర్ల ధాటికి 186 పరుగులకే చాప చుట్టేశారు. దీంతో ఇండియా ఉమెన్స్ టీమ్ 270 పరుగుల భారీ తేడాతో విజయాన్ని అందుకుని లార్డ్స్ మైదానంలో సరికొత్త చరిత్ర సృష్టించింది.
